فیصل آباد: فیصل آباد میں افسوسناک سانحہ پیش آگیا، شہری نے دو بیویوں اور 4 بچوں کو فائرنگ کر کے قتل کر دیا
ریسکیو ذرائع کے مطابق فائرنگ کے بعد ملزم کاظم نے خود کو بھی گولی مار لی، مرنے والی خواتین میں امبرین اور فضا جبکہ بچوں میں یمنہ، عروج، روما اور موسیٰ شامل ہیں۔
وقوعہ کے بعد پولیس کی بھاری نفری موقع پر پہنچ گئی، فائرنگ کی وجہ تاحال معلوم نہیں ہوسکی۔
اپنا من پسند ہیڈ سیٹ نہ دلانے پر 10 سالہ بچے نے ماں کے چہرے پر گولی چلا دی جس کے باعث وہ ہلاک ہوگئی۔
امریکی ریاست وسکونسن میں ایک نہایت افوسناک واقعہ پیش آیا، جہاں ایک 10 سالہ لڑکے نے مبینہ طور پر 2022 میں اپنی ماں کو قتل کردیا تھا۔ کویانا مان نامی مقتولہ کا بیٹا اس وقت 12 سال کا ہوچکا ہے جسے پیر کو عدالت میں پیش ہونا ہے۔
نوعمر ملزم لڑکا جس کی شناخت چھپائی گئی ہے وہ اپنے مقدمے کو نابالغوں کی عدالت میں منتقل کرنے کا خواہشمند ہے جبکہ لڑکے کا والد بھی اس اقدام میں اس کی حمایت کررہا ہے۔
اس کے والد کا کہنا تھا کہ ہمارے ساتھ متعدد بار بات کرنے کے باوجود اس نے اپنی ماں کے حوالے سے ابھی تک کچھ نہیں کہا ہے۔
دو سال قبل نومبر میں، 10 سالہ بچے نے مبینہ طور پر اپنی ماں 44 سالہ مان کو اسے ورچوئل رئیلٹی ہیڈسیٹ نہ دلانے اور اسے جلدی بیدار کرنے پر گھر میں گولی مار دی تھی۔
لڑکے نے ابتدائی طور پر دعویٰ کیا تھا کہ اس نے بندوق کو گھماتے ہوئے غلطی سے اپنی ماں کو گولی ماری۔ اس نے یہ بھی کہا تھا کہ اس کا مقصد ماں کو ڈرانے کے لیے دیوار پر گولی مارنا تھا۔
تاہم اٹارنی نے بتایا کہ مذکورہ لڑکے نے بندوق اٹھائی اور سیڑھیوں سے نیچے آیا اور باقاعدہ دونوں ہاتھوں سے بندوق کو تھام کر خاتون پر فائر کردیا۔
لڑکے نے مبینہ طور پر اپنی دادی سے کہا کہ جو ہوا اس پر مجھے بہت افسوس ہے۔ میں اپنی ماں کو مارنے کے لیے معذرت خواہ ہوں۔
پولیس کے مطابق لڑکے نے بتایا ہے کہ وہ سمجھتا ہے کہ بندوق لوگوں کو مار سکتی ہے۔ مان نے گھر کے چاروں طرف کیمرے لگائے تھے تاہم ان کی فارئرنگ سے موت کے وقت وہ ان پلگ ہو گئے تھے۔
مان کے بیٹے پر فرسٹ ڈگری جان بوجھ کر قتل کرنے کا الزام عائد کیا گیا ہے جبکہ لڑکے کے وکلا کا دعویٰ ہے کہ وہ دماغی صحت کے مسائل میں مبتلا تھا۔
آپ نے عمر رسیدہ افراد کی شادی کی خبریں پڑھی ہوں گی لیکن بھارت میں 80 سالہ دادا نے 75 سالہ نانی سے شادی رچا لی۔
بھارت میں اس انوکھی شادی کی تقریب ریاست تلنگانہ کے ضلع محبوب آباد میں ہوئی جس کی ویڈیو سوشل میڈیا پر تیزی سے وائرل ہو رہی ہے۔
رپورٹ کے مطابق محبوب آباد ضلع کے نیلی گورو منڈل کے علاقے وسترم تانڈہ سے تعلق رکھنے والے 80 سالہ سمیڈا نائک نے 75 سالہ گوگلوتو لالماں نامی خاتون کے گلے میں منگل سوتر پہنایا اور دیگر رسومات پوری کیں۔
قارئین کے لیے یہ بات حیرت انگیز ہوگی کہ دلہا اور دلہن پوتے، پوتیوں اور نواسے نواسیوں والے ہیں اور یہ ان کی ان کی شادی میں ان کی تیسری نسل نے بھی شرکت کی۔
مگر یہاں ایک اور چونکا دینے والی بات ہے کہ یہ ان دونوں کی آپس میں پہلی شادی نہیں ہے بلکہ انہیں میاں بیوی کے بندھن میں بندھے ہوئے نصف صدی گزر چکی ہے۔
مقامی لوگوں کے مطابق جن جوڑوں کی شادی کو 50 سال مکمل ہو جاتے ہیں تو شادی جیسی ایک اور تقریب منعقد کی جاتی ہے جس کو ہندوؤں میں سشتی پورتی رسم کہا جاتا ہے۔
اس بوڑھے جوڑے کی شادی دیکھنے کے لیے اطراف کے لوگوں کی بڑی تعداد جمع ہوئی تھی اور یہ ویڈیو بھی سوشل میڈیا پر تیزی سے وائرل ہو رہی ہے جس پر دنیا بھر سے دلچسپ تبصرے بھی کیے جا رہے ہیں۔
لاہور : جعل سازوں نے بینک حکام کو بھی چونا لگا دیا، مبینہ طور پر ساڑھے 5 کروڑ روپے کی جعلی کرنسی بینک میں جمع کروا دی۔
حکام کے مطابق ایف آئی اے لاہور نے پشاور کے رہائشی ہارون کو لاہور سے گرفتار کر لیا، ملزم ہارون نے27 اپریل کو 5 کروڑ 82 لاکھ روپے پشاور کے نجی بینک میں جمع کروائے، ملزم نے 29 اپریل کو لاہور سے 50 لاکھ روپے کیش کروائے۔
ملزم ہارون نے مزید 2 کروڑ روپے کیش کروانے کے لئے ڈرافٹ تیار کروایا، پشاور بینک کی اطلاع پر سندر داس روڈ لاہور واقع بینک برانچ کے منیجر نے ملزم کو گرفتار کروا دیا۔
نجی بینک کی پشاور برانچ کے منیجر کا کہنا ہے کہ ملزم کی جانب سے پشاور میں جمع کروائی گئی رقم جعلی تھی، ملزم پرانا کسٹمر تھا اس لئے موقع پر کرنسی نوٹ چیک نہیں کئے، دو دن بعد بینک کے عملے کو خیال آیا کہ نوٹ جعلی ہیں۔
بینک سٹاف کے مطابق ملزم ہارون موقع پر بینک عملے کو متعدد بار کرنسی چیک کرنے کا کہتا تھا، ملزم ہارون بینک حکام کی تسلی کے بعد گھر روانہ ہوا۔
بھارتی دارالحکومت نئی دلی کے 100 سے زائد اسکولوں کو بم سے اُڑانے کی دھمکی موصول ہوئی ہے جس کے بعد اسکول خالی کرالیے گئے۔
انڈین میڈیا کی رپورٹ کے مطابق بدھ کی صبح نئی دلی کے 100سے زائد اور بھارتی شہر نوئیڈا کے 2 اسکولوں کو ای میلز کے ذریعے بم دھماکے کی دھمکی موصول ہوئی۔
رپورٹ میں بتایا گیا کہ دھمکی موصول ہونے کے بعد بم ڈسپوزل اسکواڈ، فائر سروس کے اہلکار فوراً اسکولوں میں پہنچ گئے اور عمارتوں کو خالی کرایا گیا۔
دھمکی ملنے کے بعد اساتذہ اور طلبہ میں خوف و ہراس پھیل گیا، تاہم اسکول خالی کرواکر تمام بچوں اور عملے کو گھر بھیج دیا گیا۔
بھارتی وزارت داخلہ کا دعویٰ ہے کہ ابتدائی تحقیقات کے مطابق اسکولوں کو مصول ہونے والی ای میلز روس سے آئیں اور یہ تمام جھوٹی تھیں۔
وزارت داخلہ کی جانب سے جاری بیان میں کہا گیا ہے کہ گھبرانے کی ضرورت نہیں ہے۔ ای میلز محض جھوٹی اور مذاق لگ رہی ہیں، دہلی پولیس اور سکیورٹی ایجنسیاں پروٹوکول کے مطابق ضروری اقدامات کر رہی ہیں۔
انڈیا ٹوڈے کی ایک رپورٹ میں نامعلوم ذرائع سے حاصل ہونے والی معلومات کا حوالہ دیتے ہوئے بتایا گیا ہے کہ ابتدائی تحقیقات میں معلوم ہوا ہے کہ ای میلز کا آئی پی ایڈریس روسی زبان کا تھا۔
تاہم، دہلی پولیس کو شبہ ہے کہ ای امیل کا اصل آئی پی ایڈریس ورچوئل پرائیویٹ نیٹ ورک کے ذریعے چھپایا گیا ہو۔
ایف بی آر کی جانب سے 5 لاکھ 6 ہزار سے زائد افراد کی سمز بند کرنے کیلئے انکم ٹیکس جنرل آرڈر جاری کردیا گیا۔
تفصیلات کے مطابق ایف بی آر نے انکم ٹیکس ریٹرن فائل نہ کرنے والوں کے خلاف سخت ایکشن لینے کا فیصلہ کیا ہے۔ ایف بی آر نے 5 لاکھ 6 ہزار سے زائد افراد کی موبائل فون سمز بند کرنے کیلئے نشاندہی کرلی ہے۔
ایف بی آر نے بتایا کہ پانچ لاکھ 6 ہزار سے زائد افراد کی آمدن اتنی ہے کہ وہ انکم ٹیکس ریٹرن فائل کرنے کے قابل ہیں۔
ایسے افراد انکم ٹیکس ریٹرن فائل کرنے کے قابل ہونے کے باجود ریٹرن فائل نہیں کررہے۔ ایف بی آرانکم ٹیکس جنرل آڈر کے مطابق یہ افراد ایف بی آر ایکٹیو ٹیکس پیئر لسٹ میں شامل نہیں ہیں۔
ذرائع نے بتایا کہ انکم ٹیکس ریٹرن فائل نہ کرنے والوں کے موبائل فون کنکشنز کسی بھی وقت بند کیے جاسکتے۔
ایف بی آر کی جانب سے بند کنکشنز کی پی ٹی اے سے 15 مئی تک رپورٹ طلب کرلی گئی ہے۔
شمالی لندن کے ریلوے اسٹیشن کے باہر ایک جنونی شخص تلوار لے کر سڑک پر آگیا، جس نے حملہ کرکے متعدد افراد کو زخمی کردیا۔
غیر ملکی میڈیا کے مطابق جنونی شخص کے تلوار کے حملے سے 2 پولیس اہلکاروں سمیت 5 افراد شدید زخمی ہوگئے، جنہیں مقامی اسپتال منتقل کردیا گیا ہے۔
میئر لندن صادق خان کے مطابق پولیس نے مشتبہ شخص کو حراست میں کر تحقیقات کا آغاز کردیا ہے۔
اس سے قبل امریکا کی ریاست شمالی کیرولائنا میں فائرنگ کا واقعہ پیش آیا، جس کے نتیجے میں 3 پولیس افسران ہلاک جبکہ پانچ شدید زخمی ہوگئے۔
امریکی میڈیا کا اس حوالے سے کہنا ہے کہ مطلوب ملزم نے گرفتاری سے بچنے کے لئے پولیس اہلکاروں کو فائرنگ کا نشانہ بنایا، پولیس نے جوابی فائرنگ میں ملزم کو بھی ہلاک کردیا۔
امریکی میڈیا کی رپورٹس کے مطابق پولیس اہلکار اسلحہ رکھنے کے جرم میں مطلوب شخص کو وارنٹ دینے کیلئے پہنچے تھے کہ ملزم نے ان پر فائرنگ کردی، ملزم کی فائرنگ سے متعدد اہلکار زخمی بھی ہوئے۔
