مریم نور نے بچے کی آمد کی نوید سنا دی

 

شوبز اسٹار مریم نور اور ان کے شوہر اسماعیل بٹ کے یہاں پہلے بچے کی پیدائش متوقع ہے۔

اداکارہ و وکیل مریم نور اور ان کے پائلٹ شوہر اسماعیل بٹ جلد ہی اپنے پہلے بچے کو خوش آمدید کہنے والے ہیں۔

اپنے انسٹاگرام ہینڈل پر اداکارہ نے اپنے مداحوں اور دوستوں کو یہ خبر دینے کے لیے ایک گرافک اعلان کارڈ پوسٹ کیا۔ پوسٹر پر لکھا ہے کہ ”ستمبر 2024“، جس میں والدین کے ہاتھوں سے ایک بچے کے پیروں کی تصویر پیش کی گئی ہے۔

سماجی رابطے کی ویب سائٹ پر اعلانیہ کارڈ شیئر کرتے ہوئے نور نے کیپشن میں لکھا کہ ”ہمیں اپنی دعاؤں میں یاد رکھیں۔“

اس پرمسرت اعلان کو ان کے ہزاروں مداحوں اورمیڈیا برادری کی جانب سے زبردست جوش و خروش کے ساتھ دیکھا گیا، جنہوں نے پوسٹ کے کمنٹس سیکشن میں مستقبل کےوالدین کے لیے دلی خواہشات کا اظہار کیا۔

ساتھی اداکاروں ریحام خان، ماہم عامر، رحمت زمان اور تجربہ کار اداکارہ صبا فیصل اور ارسا غزل سمیت دیگر اداکاروں نے متوقع جوڑے کو مبارکباد پیش کی۔

واضح رہے کہ مریم نور نے نومبر 2022 میں پائلٹ اور فلائٹ انسٹرکٹر اسماعیل بٹ سے شادی کی تھی جس میں قریبی اہل خانہ اور دوستوں نے شرکت کی تھی

کراچی کے مختلف علاقوں میں زلزلے کے جھٹکے

 

سندھ کے دارالحکومت کراچی کے مختلف علاقوں میں زلزلے کے جھٹکے محسوس کیے گئے ہیں۔

تفصیلات کے مطابق ملک کے سب سے بڑے شہر کراچی کے ضلع ملیر اور اس کے اطراف کے علاقوں میں زلزلے کے جھٹکے محسوس کیے گئے۔

ضلع ملیر کے علاوہ شہر کے دیگر علاقوں لانڈھی، قائد آباد، سپرہائی وے، گڈاپ اور بحریہ ٹاؤن میں بھی زلزلے کے جھٹکے محسوس کیے گئے۔

ریکٹر اسکیل پر زلزلے کے جھٹکوں کی شدت 3.2 ریکارڈ کی گئی، مقامی وقت کے مطابق زلزلے کے جھٹکے 8 بج کر 50 منٹ پر محسوس کیے گئے۔

رپورٹ کے مطابق زلزلے کی گہرائی 12 کلو میٹر تھی اور اس کا مرکز شہر کا ضلع ملیر تھا۔

زلزلے کے بعد علاقے میں خوف و ہراس پھیل گیا، لوگ کلمہ طیبہ کا ورد کرتے ہوئے گھروں اور دفاتر سے باہر نکل آئے۔

ابتدائی اطلاعات کے مطابق زلزلے سے کسی جانی و مالی نقصان کی کوئی اطلاع نہیں ملی ۔

سندھ میں کچےکے ڈاکو بے لگام، 2 پولیس اہلکاروں سمیت 8 افرادکو اغوا کرلیا

 سندھ میں کچےکے ڈاکو  بے لگام ہوگئے ہیں، ڈاکوؤں نے 2 پولیس اہلکاروں سمیت 8 افراد مختلف مقامات سے اغوا کرلیے۔

ڈاکوؤں نے گھوٹکی کے علاقے آندل سندرانی میں پولیس چوکی نمبر 5 کونشانہ بنایا۔

ڈاکو 2 پولیس اہلکاروں کو اسلحے سمیت اغوا کرکے لےگئے، حملے کے بعد پولیس نے بھرپور جوابی کارروائی کی، اس دوران فائرنگ کے تبادلے میں ایک ڈاکو بھی ماراگیا جب کہ ایک پولیس اہلکار شہید ہوگیا۔

واقعےکے بعد مزید نفری طلب کرلی گئی ہے، مغوی پولیس اہلکاروں کی بازیابی کے لیے کوششیں جاری ہیں۔

ادھر شکار پور میں ڈاکوؤں نے آندلانی پل سے 3 اور کچے کے قریب سے ایک شخص کو اغوا کیا۔

جیکب آباد میں گاؤں گڑھی حسن سے 2 شہریوں کو اغوا کرلیا گیا، مغویوں کی بازیابی کے لیے پولیس کی کوششیں جاری ہیں۔

خیرپور میں ماڈل ٹاؤن اور بھرگڑی ریگولیٹر کے مقام پر پولیس کی ڈاکوؤں کے خلاف کارروائیاں جاری ہیں، 2 ڈاکو زخمی حالت میں گرفتار کرلیےگئے جب کہ 3 فرار 

ہوگئے۔

عزیز بھٹی شہید ہسپتال کی چھت گرنے سے 3 مریض جاں بحق، 15 زخمی

 گجرات: (کراچی نیوز ایچ ڈی) عزیز بھٹی شہید ٹیچنگ ہسپتال کی چھت گرنے سے 3 مریض جاں بحق جبکہ 15 افراد ہوگئے۔

گجرات کے عزیز بھٹی شہید ٹیچنگ ہسپتال کے زیر تعمیر سرجیکل وارڈ کی چھت گر گئی، چھت گرنے سے ملبے تلے دب کر 3 مریض جاں بحق اور 15 زخمی ہوگئے۔

ریسکیو ذرائع کے مطابق جاں بحق ہونے والوں میں 2 خواتین اور ایک مرد شامل ہیں، زخمیوں کو طبی امداد فراہم کی جا رہی ہے، وزیراعلیٰ پنجاب مریم نواز نے ہسپتال کی چھت گرنےکے واقعہ کا نوٹس لیتے ہوئے رپورٹ طلب کرلی۔

صوبائی وزیر صحت خواجہ سلمان رفیق نے گجرات میں زیر تعمیر ہسپتال کی چھت گرنے کا نوٹس لیتے ہوئے کہا کہ افسوس ناک واقعہ کی فوری تحقیقات کروائی جائیں گی، واقعہ میں ذمہ داران کا تعین کیا جائے۔ 

گرل فرینڈ کا برگر کھانے پر ایس ایس پی کے بیٹے نے جج کے بیٹے کو قتل کر دیا

 کراچی: شہر قائد میں قتل کی ایک سنسنی خیز واردات کا کیس سامنے آیا ہے، جس میں ایک دوست نے دوسرے دوست کو اس لیے قتل کر دیا کیوں کہ اس نے اس کی گرل فرینڈ کے لیے منگوایا گیا برگر کھا لیا تھا۔

تفصیلات کے مطابق کراچی کے علاقے ڈیفنس میں گرل فرینڈ کا برگر کھانے پر ایس ایس پی کے بیٹے نے جج کے بیٹے کو قتل کر دیا، پولیس کے مطابق دونوں دوست تھے۔

پولیس حکام نے جج کے بیٹے کے قتل کیس کی تفتیش مکمل کر لی ہے، تحقیقات کی فائنل رپورٹ اے آر وائی نیوز نے حاصل کر لی، جس کے مطابق ڈیفنس فیز فائیو میں 8 فروری کو جج کے بیٹے علی کیریو کا قتل ہوا تھا، اور قتل کیس میں ایس ایس پی نذیر میر بحر کے بیٹے دانیال کو گرفتار کیا گیا تھا۔

رپورٹ میں کہا گیا ہے کہ دانیال نے 8 فروری کو اپنی گرل فرینڈ شازیہ کو گھر بلایا تھا، گھر میں اس کا دوست علی کیریو اور بھائی احمر بھی موجود تھے، ملزم دانیال شازیہ کو علیحدہ کمرے میں لے گیا اور اس کے لیے دو برگر آرڈر کیے۔

رپورٹ کے مطابق آرڈر آیا تو مقتول علی کیریو نے اس میں سے ایک برگر آدھا کھا لیا، دوست کی اس حرکت پر دانیال آپے سے باہر ہو گیا اور گارڈ کی رائفل لے آیا، بھائی کی مداخلت کے باوجود اس کا غصہ ٹھنڈا نہیں ہوا اور اس نے گولی چلا دی۔

رپورٹ میں کہا گیا ہے کہ فائرنگ سے علی کیریو زخمی ہوا اور اسپتال جاتے ہوئے دم توڑ گیا۔

تفتیشی افسر نے تحقیقات مکمل کر کے رپورٹ اعلیٰ افسران کو جمع کروا دی ہے، رپورٹ میں پولیس افسر کے بیٹے کو قصور وار قرار دیا گیا ہے، جب کہ ملزم دانیال نذیر میر بحر جیل میں ہے اور کیس عدالت میں زیر سماعت ہے۔

سوشل میڈیا کی وجہ سے لوگوں کی شادیاں نہیں ہو رہیں، ژالے سرحدی

 پاکستانی معروف ماڈل و اداکارہ ژالے سرحدی کا کہنا ہے کہ آج کل سوشل میڈیا کی وجہ سے لوگوں کی شادیاں نہیں ہو رہیں کیونکہ اب لوگ بہتر سے بہتر کی تلاش میں رہتے ہیں۔حال ہی میں ژالے سرحدی نے نجی چینل کے شو میں بطور مہمان شرکت کی اور اپنے کیریئر سمیت نجی زندگی کے حوالے سے کھل کر گفتگو کی۔دوران شو اداکارہ سے سوال کیا گیا کہ آپ سوشل میڈیا پر بہت خوش نظر آتی ہیں تو کیا اصل زندگی میں بھی اتنی ہی خوش رہتی ہیں؟اداکارہ نے جواب دیا کہ خوشیاں بانٹنے سے بڑھتی ہیں اس لیے وہ اپنے خوشگوار لمحات مداحوں کے ساتھ شیئر کرتی ہیں، زندگی میں اتار چڑھاؤ آتے رہتے ہیں لیکن وہ جب اداس یا پریشان ہوتی ہیں تو ایسے لمحات کو سوشل میڈیا پر شیئر نہیں کرتیں۔دوران گفتگو شادیوں اور تعلقات کے حوالے سے ایک سوال کا جواب دیتے ہوئے ژالے سرحدی نے بتایا کہ انہیں ان کے شوہر اور غیر شادی شدہ دوستوں نے بتایا کہ ہم لوگوں کی شادیاں سوشل میڈیا کی وجہ سے نہیں ہو رہی ہیں۔انہوں نے وضاحت دیتے ہوئے مزید کہا کہ آج کل سوشل میڈیا پر خواتین کی اتنی تعریفیں کی جاتی ہیں کہ وہ خود کو حسین سمجھتی ہیں اس لیے وہ آنے والے ہر پرپوزل کو یہ سوچ کر مسترد کردیتی ہیں کہ ان کے پاس بہت آپشنز ہیں یہی وجہ ہے کہ ان کی شادیاں نہیں ہو رہیں یا ان میں تاخیر ہو رہی ہے۔

صدر میں قائم شاپنگ سینٹر میں آتشزدگی، کروڑوں کا سامان خاکستر

 پشاور کے علاقے صدر میں قائم شاپنگ سینٹر میں اچانک آگ بھڑک اٹھی جس سے کروڑوں کا مال جل گیا، جبکہ 4 گھنٹے گزر جانے کے باوجود آتشزدگی پر کنٹرول نہ ہو سکا، فائر فائٹرز آگ بجھانے کی کوششوں میں مصروف ہیں۔حکام کے مطابق پشاور کے شاپنگ سینٹر میں شارٹ سرکٹ کی وجہ سے ہوئی آتشزدگی پر کنٹرول کرنے کیلئے فائر بریگیڈ کی 26 سے زائد گاڑیاں اور 130 سے زائد فائر فائٹرزآ گ بجھانے کے عمل میں مصروف ہیں جبکہ دیگر اضلاع سے بھی فائر فائٹرز کی ٹیمیں اور فائر بریگیڈ کی گاڑیاں بلوالی گئی ہیں۔ریسکیو حکام کا کہنا کہنا تھا کہ آگ نے پورے پلازا کواپنی لپیٹ میں لے لیاہے ، 2 منزلہ عمارت میں تقریبا 200 دکانیں ہیں، شاپنگ سینٹر میں بیٹریاں اور یو پی ایس پھٹنے سے آگ کی شدت میں اضافہ اور کنٹرول کرنے میں مشکلات پیش آ رہی ہیں۔حکام کے مطابق شاپنگ سینٹر کے قریب واقع گھروں کوخالی کرالیا گیا، شاپنگ سینٹر میں بیٹریز اور یو پی ایس پھٹنے سے آگ بڑھ رہی ہے۔ریسکیو حکام کے مطابق شاپنگ سینٹر میں موبائل فون، یو پی ایس اور دیگر الیکٹرانکس کی دکانیں ہیں، فوری طور پر کسی جانی نقصان کی اطلاع نہیں ملی۔